Prográmanse actividades paralelas de apoio, que complementan a actividade habitual de ensinanza-aprendizaxe, co obxectivo de subsanar deficiencias puntuais ou do perfil de ingreso.
Estas actividades poden ser obradoiros sobre tecnoloxías ou procesos específicos, ciclos de proxeccións ou conferencias, etc.
Co fin de promover e facilitar a mobilidade de estudantes, organízanse charlas informativas por parte da Oficina de Relacións Internacionais ou pola propia facultade. Así mesmo existen as figuras de Coordinador de Programas Erasmus, Sicue e demais programas de mobilidade, que entre as súas funcións teñen a de asesorar e orientar ao estudantado nos seus programas respectivos, tanto aos propios como aos alleos.
En momentos puntuais do desenvolvemento normal dos estudos nos que se considera que o ou a estudante necesita especial orientación (no momento de elixir materias optativas, por exemplo), prográmanse reunións sobre eses aspectos concretos.
Existe unha Delegación de Alumnos que, aparte dos protocolos establecidos polo Sistema de Garantía de Calidade para a canalización de suxestións e reclamacións, serve de enlace entre os e as estudantes de maneira individual ou colectiva e o equipo directivo da titulación.
A facultade pon á súa disposición os medios necesarios e unha partida orzamentaria para que poidan cumprir a súa tarefa de representación e outras como facilitar a realización de propostas e iniciativas do alumnado.
A Universidade de Vigo conta co seu propio Gabinete Psicopedagóxico a disposición do estudantado para orientalo e asistilo tanto en cuestións académicas como noutras de índole persoal. Por outra parte, a Universidade ten en marcha un programa de apoio á integración do alumnado con necesidades especiais (PIUNE) para facilitar a súa vida académica e garantir o seu dereito ao estudo.
Por outra banda, o sistema de garantía de calidade (SGIC) desta Facultade recolle o procedemento de orientación ao alumnado e atención ás necesidades específicas de apoio educativo (DO 0203 Ind. 05 Orientación al alumnado).
